Паян, ҫӗртме уйӑхӗн 9-мӗшӗнче, Шупашкар муниципаллӑ округӗнче Ишек ярмӑркки иртрӗ.
Ишек пасарӗн директорӗ Лариса Кудряшова палӑртса хӑварнӑ тӑрӑх, кӑҫалхипе 244-мӗш хут пуҫтарӑнать вӑл тӑрӑхри халӑх Ишек ярмӑрккине.
Ярмӑрккӑна вырӑнти тӳрӗ-шараран округ администрацийӗн пуҫлӑхӗ Владиммр Михайлов тата Шупашкар районӗнчи тӗп пульницӑн тӗп тухтӑрӗ Владимир Викторов пынӑ. Тухса калаҫакансем пурте чӑвашла калаҫрӗҫ. Владимир Михайлович та хӑйӗн саламлӑ сӑмахне тӑван чӗлхепе пуҫларӗ.
Программӑна ертсе пыраканни ҫеҫ темшӗн вырӑсла калаҫрӗ. Баннера та, сӑмах май, вырӑсла хатӗрленӗччӗ.
Ярмӑрккӑра вырӑнти юрӑ-ташӑ ӑстисем, чӑваш эстрада юрӑҫисем (Чӑваш Республикин тава тивӗҫлӗ артисчӗсем Стас Владимиров тата Катя Петрова, Чӑваш Республикин культурӑн тава тивӗҫлӗ ӗҫченӗ Алексей Шадриков, Дмитрий Никифоров) хутшӑнчӗҫ. Вӗсем пурте чӗрӗ сасӑпа юрларӗҫ.
Чӑваш Енре выльӑха аукционта сутӗҫ. Кун пекки унччен пулман.
Аукционта сутма ӑратлӑ 200 выльӑх тӑратӗҫ.
Тулеграмри «Чӑваш Ен калаҫать» каналта пӗлтернӗ тӑрӑх, республикӑшӑн ҫӗнӗ ӗҫ-пуҫ утӑ уйӑхӗн 11-мӗшӗнчен 13-мӗшӗччен «Чебомилк» агрокомплексра иртӗ.
Хуҫалӑхра 5400-е яхӑн мӑйракаллӑ шултра выльӑх. Агрокомплексра пӗлтернӗ тӑрӑх, аукцион ирттерни выльӑха аш-какайшӑн мар, ӑратӑн паха енӗсемшӗн туянас текенсемпе тӗл пулас тени.
3 куна пыракан программӑра – экскурси, конференци тата аукцион .
Шупашкар муниципаллӑ округӗнчи Тренккассинче врач амбулаторийӗ тума тытӑннӑ. Халӗ унӑн кирпӗч стенисене хӑпартса пӗтернӗпе пӗрех. Шыв пӑрӑхне тата канализаци пӑрӑхӗсене хурса тухнӑ. Нумаях пулмасть «СКОМ 21» организаци (ӗҫе подрядчик пулса вӑл пурнӑҫлать) ҫивиттие витӗ.
Объекта епле хӑпартнипе паллашма Шупашкар районӗнчи тӗп пульницӑн тӗп врачӗ Владимир Викторов пырса кайнӑ. «Строительство ӗҫӗсем аван пыраҫҫӗ», – ӗҫ хӑвӑртлӑхӗпе кӑмӑллӑ юлнӑ Владимир Николаевич.
«Ҫӗнӗ здани пӗр хутлӑ пулӗ. Унта ватӑ ҫынсене тата сусӑрсене кӗрсе тухма меллӗ пулӗ», – тенӗ Зоя Ефимова тата Наталия Оливанова медсестрасем.
«Пирӗн ялта врач амбулаторине тунишӗн питӗ савӑнатпӑр. Пирӗн посёлок ҫамрӑк, ачасем ялта нумай», – хавхаланса калаҫнӑ ҫав ялта пурӑнакан Галина Вылегжанина.
Шупашкар муниципаллӑ округӗнчи Салапайкасси ялӗнче социаллӑ-культура центрӗ уҫӑлмалла. Ӗҫ-пуҫ епле пынипе республикӑн культурӑн министрӗн ҫумӗ Татьяна Казакова паллашнӑ. Министерство ҫыннипе муниципалитет округӗн пуҫлӑхӗ Владимир Михайлов та ҫула тухнӑ.
Объекта «Культурӑна аталантарасси» патшалӑх программипе килӗшӳллӗн хӑпартаҫҫӗ. Центра кӑҫал туса пӗтермелле.
Культура учрежденийӗнче 100 вырӑнлӑх зал, кружок ӗҫлемелли пӳлӗм, вулавӑш, артистсен пӳлӗмӗ, гардероб, вестибюль тата санузел пулӗ.
Ӗнер, ҫу уйӑхӗн 15-мӗшӗнче, К.В. Иванов ячӗллӗ Чӑваш патшалӑх академи драма театрӗнче Раҫҫей тава тивӗҫлӗ артисчӗн, чӑваш халӑх артисчӗн Владимир Семёновӑн юбилей каҫӗ иртрӗ. Ака уйӑхӗн 16-мӗшӗнче вӑл 75 ҫул тултарнӑ.
Пулас артист Шупашкар районӗнчи Ҫӗньял-Покровски ялӗнче ҫуралнӑ. Вӑл яштака та вӑр-вар, ҫӑмӑл кӗлеткеллӗ. Ӑна саламлама ӗнер тӑван тӑрӑхӗнчисем те пырса ҫитнӗ. Ленинградри театр училищинче пӗрле вӗреннӗ Михаил Боярский тата Сергей Паршин артистсем тата ыттисем саламлӑ телеграммӑсем янӑ. Анатолий Аксаков депутат ячӗпе те саламларӗҫ.
Юбилей каҫӗнче «Чунӑм, Лиза-Акулина» кӑтартрӗҫ. Унта артист Григорий Муромский боярин ролӗнче вылярӗ.
Шупашкар муниципаллӑ округӗнче прокуратура муниципалитет пурлӑхӗпе мӗнле усӑ курнине тӗрӗсленӗ.
Ҫакӑ палӑрнӑ: пӗр территори уйрӑмӗн пуҫлӑхӗ служба машинипе хӑйӗн тӗллевӗсемпе усӑ курнӑ. Вӑл кӑҫал нарӑс тата пуш уйӑхӗсенче канмалли тата уяв кунӗсенче хӑйӗн ӗҫӗсемпе ярӑнса ҫӳренӗ, округ тулашне те тухнӑ.
Прокуратура пуҫлӑх тӗлӗшпе административлӑ ӗҫ пуҫарнӑ. Материалсене миравай суда пӑхса тухма янӑ. Суд йышӑнӑвӗпе килӗшӳллӗн, должноҫри ҫыннӑн штраф тӳлемелле.
Ҫу уйӑхӗн 15-мӗшӗнче К.В. Иванов ячӗллӗ Чӑваш патшалӑх академи драма театрӗнче Раҫҫей тава тивӗҫлӗ артсичӗн, чӑваш халӑх артисчӗн Владимир Семёновӑн юбилей каҫӗ иртӗ. Ака уйӑхӗн 16-мӗшӗнче вӑл 75 ҫул тултарнӑ, ҫав шутран 52 ҫулне чӑваш театрӗнче ӗҫлет.
Владимир Валентинович Шупашкар районӗнчи Ҫӗньял-Покровски ялӗнче ҫуралнӑ. 1972 ҫулта Ленинградри театр, музыка тата кинематографи институтӗнчен вӗренсе тухнӑ. Ун хыҫҫӑ ӑна Чӑваш драма театрӗн туппине илнӗ.
Ентешӗмӗр ҫак ҫулсенче 170 ытла тӗрлӗ сӑнара калӑпланӑ. Юбилей каҫӗнче «Чунӑм, Лиза-Акулина» кӑтартӗҫ. Унта артист Григорий Муромский боярин ролӗнче пулӗ.
Чӑваш Енре туристсем йышлӑ килсе ҫӳренине кура номе фондне пысӑклатса пыраҫҫӗ. Кӑҫалхи карлач-нарӑс уйӑхӗсенче хӑна ҫурчӗсенче чарӑннӑ туристсен шучӗ пӗтӗрхи ҫулталӑк пуҫламӑшӗнчи икӗ уйӑхринчен 28 процент ӳснӗ.
Чӑваш Енӗн Экономика аталанӑвӗн министерстви пӗлтернӗ тӑрӑх, экотруизм валли ҫӗнӗ вырӑнсене кӑҫал Шупашкар, Улатӑр, Куславкка, Красноармейски тата Канаш муниципаллӑ округӗсенче уҫма палӑртнӑ. Асӑннӑ тӑрӑхсенче 235 номерӗ 165 ҫурт туса лартмалла.
Шупашкар тӑрӑхӗнче пурӑнакан 63 ҫулти сунарҫӑна 40 пин тенкӗ штраф хурса панӑ.
Ҫав арҫынна РФ Пуҫиле кодексӗн 318-мӗш статйин 1-мӗш пайӗпе явап тыттарнӑ. Тепӗр майлӑ каласан, влаҫ ҫыннине хирӗҫ тӑнӑшӑн суд тенкелӗ ҫине лартнӑ.
Следстви тата суд палӑртнӑ тӑрӑх, пӗлтӗрхи раштав уйӑхӗн 1-мӗшӗнче арҫын Ишлей патӗнчи сунар ҫӗрӗ ҫинче ҫӳренӗ. Унӑн автомобиль салонӗнче авӑрланӑ пӑшал (вӑл ятарлӑ сумкӑра выртман) пулнӑ. Ку вӑл саккуна административлӑ майпа пӑсни пулать.
Сунарҫӑна Чӗрчунсен тӗнчине тата ятарласа хӳтӗлемелли ҫутҫанталӑк территорине сыхлас тата упрас енӗпе ӗҫлекен дирекци инспекторӗ тытса чарнӑ. Хӑйне административлӑ майпа явап тыттарассине пӗлсен 63 ҫулти арҫын инспектора хирӗҫ тӑнӑ. Апла пулин те инспектор парӑнман.
Шупашкар районӗнчи Самуккассинче чӑваш поэтне тата журналистне, Георгий Порфирьева (Ирхие), асра тытса асӑну хӑми уҫнӑ. Ӑна паллӑ ҫын пурӑннӑ ҫуртӑн тимӗр карти ҫине ҫакса хунӑ.
Поэта лайӑх пӗлекенсем каланӑ тӑрӑх, вӑл пиллӗкре чухне ялти библиотекӑна ҫырӑннӑ та ҫиччӗ тултарнӑ тӗле ҫӳлӗк ҫинче вуламан кӗнеке те хӑварман имӗш.
«Чӑваш Ен» ПТРК пӗлтернӗ тӑрӑх, пӗчӗкрен литературӑна чуншӑн ҫывӑх йышӑннӑ ача ҫитӗнсен хӑйне тӗрлӗ профессире шыранӑ. Чӑваш патшалӑх университетӗнче пӗлӳ илсен Пукане театрӗн сцени ҫинче вылянӑ, Чӑваш патшалӑх телерадиокомпанийӗнче 30 ҫул ытла редакторта тӑрӑшнӑ. Георгий Ирхи вырӑсла тата чӑвашла ҫырнӑ.
Авторӑн кӗнекисен шутӗнче: «Шыври хӗвел», «Тасалу», «Вӑтанчӑк аслати».
-4.7 °C